Tins des condjîs, nosse tchèt, Arsouye, è oyu la mwêche idéye du raminè des sèris.

Dju l’ vè, passant pa la bawète avu ène speedy dins la gueuye èt, la grosse bièsse (Arsouye), tot fiér èt come s’ i riyot, drûve sa gueuye èt… èvôye la sèri ! Abîe dzos les meubes ! Nin moyin d’ la rapicè. Nosse gros bêta, ô mitan dol cûjine, avu s’ n-êr d’ awârè, brâmint trop spès, n’ôrot seu passè non pus !

Kékes tins s’ passe. On pon après, dju m’ va a ma séyance du kiné èt dju lê Silvîe, nosse fô pourcê èt speedy al môjon. I fjot télmint calme ki la gârce (la sèri, nin Silvîe) sôrte du sa catchète, passe padrî l’ frigo, file tot l ‘long do mer èt va mougnè dins la gamèle do tchèt. Tote subaréye, nosse Silvîe lève ses pîds èt s’ assît s’ la tôle : èle avot la pèpète ! C’è-st-insi ki dju l’ ê rtrovûe an rintrant.

Deus, trwas djoûs pus tôrd, minme comèdîe: la ptite seur du l’ ôte u bin s’ n-amant… (ca duspôy kékes djoûs dj’ atindo brâmint do ramdam addé la poubèle : les papîs chîtyint).

Ayîr, todi avu Silvîe, dj’ avans mètu des trapes : kéne afinre po les montè ! On ptit bokèt d’ fromadje èt, tins dol nut’, deus k’ astint capout’. Ô matin, m’ n-ome les è pètè al poubèle èt dj’ avans rmètu des novèles trapes. Vè onze eures, dju rpasso la bwéye, lu gros bôyô astot coutchè s’ la tôle èt … clap … ène twazime : ène étranjére u bin èn èfant des deus ôtes ? Dj’ ê on samblant d’ rèsponse, ca an rintrant d’ l’ après non.ne, i gn avot co deus. La chîjime èst moru dol nut’ èt la dêrin.ne, dju l’ê rtrovûe pa dzos l’ gâz ayîr an djouwant al bale avu nosse « tchèsseu ».

Moralitè : pèrdez in tchèt po tchèssè les sèris èt vos nn-ôrez co d’ pus ki dvant !!